اكيد شفت او جربت تغرز بسياره وكل الي حولك يقولون لك ها نسمت؟ ليش ما نسمت؟
ليش التنسيم مهم؟ وايش بيفرق تنسيم الهوا معنا؟ بنتناول التنسيم بشكل علمي علشان تعرف كيف تختار ضغط الهواء المناسب لإطاراتك.
كوب شاهي او قهوه وبإسم الله خل نبداء
قيادة سيارة دفع رباعي على النفود او الرمال تتطلب فهم مبدأين بسيطين، والي هم: ضغط الإطارات وقوة الدفع، بالإضافة إلى تطوير بعض تقنيات القيادة بس بنتكلم ونشرح قوة الدفع في مقال آخر وبنتكلم عن ضغط الهواء في الإطارات هنا.
في النفود والرمال العميقة، الشي الأساسي الي يخلي السيارة تمشي للامام هو ضغط الإطارات. اعرف كيف توزن ضغط الإطارات على الرمل وبتتحسن فرصك ان شاء الله للنجاح للقيادة فوق الرمال والقيادة بدون متاعب.
القصور الذاتي
وش هالكلمة الي ما تنفهم؟ ابشرح لك!
القصور الذاتي هو قابليّة الأجسام المتحركة للاستمرار بالحركة وقابليّة الأجسام الساكنة للبقاء ساكنة. يعني "مقاومة الجسم المتحرك للسكون، ومقاومة الجسم الساكن للحركة".
بكل بساطه حنا متورطين بالسواقة في الرمل بسبب القصور الذاتي.
لما تدور الاطارات فوق الرمل، الاطارات تغوص في الرمل لأن الإطارات (الكفرات) تشوف ان تحريك او دفع الرمل أسهل من دفع السيارة إلى الأمام. ومع دوران الإطارات الأربعة، نتمنى أن قوة الدفع للسيارة كافية علشان تمشي السيارة الى الأمام بدال التغريز. إذاً نحتاج نركز على ان الرمل تحت الاطارات يبقى متماسك على الاقل حتى تتجاوز بصمة الاطارات المكان الي فيه الرمل بدل الغوص فيه.
ونقدر نحسن من تقليل المقاومة عن طريق تنسيم الإطارات وتقليل ضغط الهواء فيها. شوف الرسم التوضيحي البسيط، بتاخذ فكرة ليش مهم تنسم الإطارات
لما تنقص ارتفاع الإطار بنسبة 25٪ من خلال تنسيم الهواء، بتزيد بصمة دعسة الإطار على الأرض بنسبة توصل إلى 200٪. وهنا يصير الإطار أقرب في فكرته إلى جنازير البلدوزر.
والنتيجة هي زيادة كبيرة في مساحة التلامس مع السطح، وهذا يسهل على الإطارات دفع السيارة إلى الأمام بدال ما تغرز في الرمل.
كيف تحدد ضغط الإطارات الصحيح للقيادة على الرمال؟
خل نفترض إن ضغط هواء الاطارات عندك هو الضغط المناسب للشارع. بنستخدم هذا الضغط كمعيار اساس ننقص الهواء منه ونحدد الضغط المناسب للقيادة على الرمل.
وقف سيارتك في مكان متساوي وارض قاسية سواء شارع او في البيت او حتى في البر لاكن مكان قاسي اهم شي. قس المسافة بين الحافة السفلية من الإطار والطريق (أ)
نقص ضغط هواء الاطارات حتى تصير هذه المسافة 75٪ من الارتفاع الأصلي (ب)
على سبيل المثال، إذا كانت المسافة في المثال (أ) هي 100 مم، فإن المسافة في المثال (ب) تصبح 75 مم.
المثال (أ) يوضح ضغط الإطارات المناسبة للقيادة في الشارع و(ب) هو ضغط الإطارات المناسب للقيادة في الرمال هذي بصفة عامة. قد تختلف بإختلاف انواع الاطارات وحمولة المركبة لاكن هذا قاعدة نقدر نبني ونعدل عليها حسب معطيات السيارة والاطارات وطريقة القيادة.
قس وسجل هذا الضغط عندك واستخدمه كنقطة انطلاق في المرة القادمة الي بتسوق فيها سيارتك على الرمال.مافيه بيئتين متشابهه من بيئات القيادة ولا وسيارتين زي بعض. فيه عوامل كثير تؤثر مثل نوع الرمال ووزن السيارة والإطار كلها لها دور في تحديد الضغط الصحيح للإطارات ولا يمكن لأي عامل لحاله ينجح في كل حالة.
كثير من السواقين حافظين ان الضغط لازم يكون بين 18 الى 22 psi للسواقة في الرمال. لاكن في عوامل كثير غير ضغط الهواء. على سبيل المثال رطوبة الرمل ودرجة حرارته تؤثر على انطلاق السيارة واستمرارها فوق الرمال. تحديد الضغط المناسب بيعتمد بشكل كبير على المكان والتظاريس بالإضافه الى وزن السيارة ونوع وحمولة الاطار. ولاكن تقدر تنزل في الضغط حتى تجد الضغط المناسب والي يخلي السياره تنطلق للأمام بدون تغريز.
مهم جداً الانتباه ان تقليل ضغط الاطارات والقيادة لمسافات طويلة او سريعة يزيد من حرارة الاطار وقد يتضرر لا قدر الله. التقليل الزائد او القيادة والانعطاف بخشونة ممكن يفصخ الاطار. لذلك يجب الإنتباه لهذه العوامل عند القيادة على الرمال
تجنب القيادة بسرعات عالية وقيادة السيارة على الزفلت إن أمكن. إذا كنت مضطر للقيادة على الزفلت والهواء قليل بالإطارات، فخلك حذر عند الالتفاف والفرملة ولا تسرع.
المعدات والتجهيزات
مهم جداً وجود عداد مقياس ضغط الاطارات وجهاز نفخ الاطارات المعروف بالكومبريسور. بعون الله وجود هالجهازين معك بيساعدك في ضبط الضغط وتحديد الضغط المناسب للمكان.
اذا بتطلع للبر او للنفود بشكل كثير. حاول تتجنب المنفاخ الي ينشبك على فيش الولاعة. غير ان الفيش غير مصمم للجهد الكهربائي العالي. بيكون جداً جداً بطيء فلي النفخ وبيكون الموضوع مزعج للإستخدام. منفاخ مثل جهاز ARB رائع ويتركب على البطارية بشكل مباشر. وهذا رابط المنتج.
مافي شك ان القيادة والحرية في القيادة على الرمال ممتعة بشكل لا يوصف. ولاكن تقليل الضغط يساعدك في المحافظة على السيارة والاطارات وتقليل استهلاك الوقود.
والان بعد ما صار عندك فكرة عن ضغط الاطارات. شوف دليل التجهيزات على الرابط هذا